Օձունի համայնքապետարանի առաջատար մասնագետ, իրավաբան Մարիամ Ասրյանը շուրջ երկու տարի է՝ Օձունում ձեռագործության խմբակ է բացել: Սիրում է ձեռագործությունն ու խումբ ստեղծելը արել է սիրողական հիմունքներով, ուստի այն սիրով համատեղում է պետական աշխատանքի հետ:

«Ես ուղղակի գործել շատ եմ սիրում, հիմնականում՝ հելունագործություն և ուլունքագործություն: Նախ փորձել եմ հելունագործությամբ զբաղվել: Իմ աշխատանքներից նաև փոքրիկ վաճառք եմ իրականացրել, բայց զգացի, որ բիզնեսն այդքան էլ լավ չի ստացվում ինձ մոտ ու փորձեցի երեխաների խումբ հավաքել՝ ձեռագործություն սովորեցնելու նպատակով: Այժմ 9-13 տարեկան շուրջ տասը երեխա է հաճախում խմբակ»:

Սաների հետ աշխատանքը սկսել է ասեղնագործությունից, ապա խաչկար, ուլունքագործություն ու հելունագործություն են սովորել:

«Չնայած խումբը ստեղծվել է երկու տարի առաջ, բայց մոտ 1 տարի ենք բնականոն աշխատել, որովհետև խմբի ստեղծումից որոշ ժամանակ անց սկիզբ առավ համավարակն ու երեխաները հարկադրված գալիս էին ամիսը մեկ անգամ կամ օնլայն տարբերակով էինք աշխատում, իսկ կրկնակի ճգնաժամից հետո ընդհանրապես չենք աշխատել: Հիմա արդեն նորից վերածնվում ենք»,- մանրամասնում է Մարիամը:

Ուրախությամբ հայտնում է, որ անկախ հանգամանքներից «Ճախարակ» խումբն Օձունում իր տեսակով առաջինն է, որ տևական ժամանակ գործել է ու նույնիսկ փոքրիկ ցուցահանդես ունեցել:

Խոսելով «Ի գործ» ծրագրի շրջանակում ձեռք բերած փորձառությունների մասին, նկատում է՝ եթե նախկինում դժվարանում էր մարքեթինգի, գովազդի իրականացման հարցում, ապա այժմ դրանց իրականացման վերաբերյալ օգտակար գիտելիքներ է ձեռք բերել, ինչը շատ կարևոր է համարում ապրանքատեսակը ճիշտ ներկայացնելու հարցում:

Այժմ Մարիամի գլխավոր նպատակն այն է, որ խումբն ավելի լավ աշխատի, ընդլայնվի ու գուցե կարողանան փոքրիկ ցուցադրություններ կազմակերպել: Կարծում է՝ այդպես հնարավորություն կունենան վաճառել իրենց ձեռքի աշխատանքներն ու ստացված եկամուտը նորից ներդնեն խմբի զարգացման մեջ, հատկապես որ «Ճախարակ» խումբը, ծրագրի շրջանակում, ձեռք է բերել տարատեսակ թելեր ու ձեռքի աշխատանքների համար անհրաժեշտ պարագաներ: